Titolo: NA
ONTA & NA PONTA
Sottotitolo: Tra i tanti libri novi, i più richiesti ultimamente: "il
conte di Montezemolo" e "I cannoni di Taricone"
Pare che in Italia se leza pochi libri rispèto a tuti i altri paesi
europei, e no se capisse el parchè e el parcome. Forse parchè ne
manca el tenpo digo mi. Mi tuto quèo che go leto, lo go leto in bagno.
Ghe ze do boni motivi par lezare un libro: uno, parchè te piase e st'altro
parchè te poi vantarte de averlo leto. Comunque no basta avere tanti
libri, come che dise me mujere, dopo bisogna anca cavarghe a polvere !.
Tanti libri novi i vièn desmentegà nel giro de un ano, in particolare da
quèi che te ghe li ghè inprestà.
De libri i ghe ne fa de tute le sorte. I libri manco vendùi l'ano
scorso, e no se capisse el parchè, ze sta :"Il segreto della mia
intelligenza", di Valeria Marini , "Guida alle democrazie arabe" e
"Guida del'avocato onesto".
Invesse i Libri più richiesti ultimamente ze: "Il diario di Anna
Falchi"; "Le favole di Esofago"; "Il fu Matia Bazar"; "Giovanna d'Arcore";
"Il Conte di Montezemolo"; "I cannoni di Taricone"; "L'amaro" di Moliere;
"L'amuleto" di Shakespeare; "Cristo si e' fermato ad Empoli" di Levi.
Ze che, in fato de libri, forse semo ignoranti come el paltàn, e la
nostra grezessa te la vedi dale domande pi strane che ghe vien fate ai
pori comessi dele librerie: - Vorrei "Alla ricerca del tenpo
perduto" di Alan Prost, quèo che core in formula uno - ; - Vorìa un
libro che no me ricordo pì l'autore, el se intitola: "Tutte le
poesie".-; - Mi me serve un metro e mezo de libri, no inporta de che
tipo, l'inportante ze che i gabia tuti lo stesso colore...-; - Vorìa un
libro che no me ricordo ne' el titolo ne' l'autore, e no so gnanca de
cossa che se parla, ma so che el ze picolo e rosa...-; -Vorìa el
"Risotto di Doria Gay" e anca "le palle" di Malaparte'-; - Gavìo par
caso "Sequestro un uomo" di Primo Levi e "Braccobaldo" di Calvino ?!.
Ghe domando a me cugìn chel gà fato el geometra serale, e tuti i lo
considera 'na siensa: "Preferissito i scritori italiani o stranieri?".
"Mi Preferisso lezere i libri dei scritori italiani parche' le lingue
straniere no le so". : "Scusa, ma gheto leto, almanco la Bibia?
Conossito el Novo Testamento?". "Varda, la Bibia la conosso bastansa
parche' so un bon cristian, praticamente praticante, ma quel'altra roba
che te ghè dito "nova" no la conosso, parche' non so tanto aggiornato .
Tenpi duri par i libri!
Bronse QuerteIl
Gazzettino di Padova , Domenica 14 Ottobre 2007 |
